Қазақ жастарын қандай күш біріктіруі мүмкін?

Бүкіл қазақ жастарын білім біріктіреді дейін десем,
білім 14 пен 29 жас аралығындағы мектепте және
ЖОО-да оқитын жастарды ғана біріктіре алады,
ал бізде жалпы орта мектепті бітіріп не оқуын
бітіріп жұмыс істеп жатқан жастар қаншама? Демек, білім жастарды толыққанды біріктіреді деп айту қиын.
Ал, өнер біріктіреді десек, өнер – Алланың ерекше
құдіретімен адам атаулысына берілетін қасиет.
4,5 млн.-ға жуықтайтын жастардың барлығы дерлік өнерлі дегенге сену қиын. Олай болса, барлық жастарды өнер де біріктіре алмайды екен.
Жастарды әлеуметік жағдай біріктіруі мүмкін деуге тағы да болмайды. Себебі, жастардың әлеуметтік жағдайы әр түрлі. Біреуі жағдайы жақсы отбасыдан шықса, енді біреуі студент, енді біреуі ата-ансыз, өзге біреуі мүмкіндігі шектеулі. Мінекей, әлеуметтік жағдай қазақ жастарын түбегейлі біріктіре алмайды екен.
Сонымен, қазақ жастарын қандай күш берік әрі мығым етіп біріктіруі мүмкін? Менің ойымша, барша жасты иман, дін біріктіруі керек. Барды да, жоқты да теңестіретін ислам дінінде барлық адам ештеңеге қарамастан бір-бірімен тең. Барі де бір Алланың құлы. Сондықтан да дін - ең негізгі біріктіруші күш, әрі тәрбие құралы.

Ай сайын бас қосқан жиын болады...

Қазақты Мөңкедей биі барда, Абайдай ақыны барда, Құрманғазыдай күйшісі барда,.....дара демеске шамаң да, шараң да жоқ.. Сөзімнің төркіні не себепті Мөңке биден басталғанын біреу сезсе, біреу сезе қоймас. Себебі, Нострадамустан асып түспесе, кем болмайтын Мөңке бидің ойлы сөздерін бей-жай оқи салу жарамас-ты. Дегенім дәлелсіз болмас үшін мысал келтіре кетейін:
- Құрамалы, қорғанды үйің болады,
Айнымалы, төкпелі биің болады.
Халыққа бір тиын пайдасы жоқ,
Ай сайын бас қосқан жиын болады.
Ішіне шынтақ айналмайтын,
Ежірей деген ұлың болады.
Ақыл айтсаң ауырып қалатын,
Бежірей деген қызың болады.
Алдыңды кес-кестеп өтетін,
Кекірей деген келінің болады.
Ішкенің сары су болады,
Берсең итің ішпейді,
Бірақ адам оған құмар болады.
Домалақ-домалақ түймедей дәрің болады,
Жастарға билігі жүрмес кәрің болады.
Ертеңіне сенбейтін күнің болады,
Бетіңнен алып түсетін інің болады.
Алашұбар тілің болады,
Дүдәмалдау дінің болады.
Осылайша кете береді. Бұл мысал теңізге тамызылған тамшы судай ғана ғой. Әлі қаншамасы бар. Әрине, құрамалы, қорғанды үйлердің көбі рас, бірақ үйсіздер көп. Елімізде шамамен 1,3 млн адам баспанаға мұқтаж, Құрылыс департаментінің мәліметі бойынша, Алматы қаласының өзінде 400305 адам кезекте тұрған көрінеді. Айнымалы билерді санап шықпағаным рас, бірақ бүгінде «Тура биде туған жоқ, туғанды биде иман жоқ» деген қағида жоқтың қасы, билердің қалтасына қомақты қаржы түспей әділ шешім шығармайтыны баршаға аян. Ал, егер туыстары істі болып, би оған теріс қабақ танытса, ағайындары оны қарғыстың астына алып, «би болған соң тойынған» деп бетін көрмей кетер еді. Жиынның қаншалықты көп болатынын күнделікті теледидар мен радио, газет беттерінен көріп-біліп жүрген боларсыздар. Ай сайын емес, күн сайын болған жиыннан халыққа түсіп жатқан пайда қарлығаштың қанатымен су сепкендей де болмас, сірә?!
Ұлға келер болсақ, арам астан дәм татып алып, өз әкесін ұрған жігіттер мен ата-анасының пікіріне қолын бір сілтеп жөнелетін арулар қаншама?! Мөңке бидің сөздерін оқып отырып қазақтың топырағына сан мәрте бас иесің!
P.S. Болашақ Мөңке билердің құлақтарына алтын сырға…

Бала – бауыр етің...

Бала – бауыр етің әрі болашағың, яғни өсіріп жатқан бәйтерегің. Бірақ, оны дұрыс тәрбиелемесең, тікенек боп қадала кетеді. Көптеген жас ата-аналардың: «Біз жаман бол деген жокпыз,керісінше адам бол деп өсірдік, бірақ баламыздың қалай осындай тәрбиесіз боп шыққанын білмей қалдық,» - деген пікірін естіп қаламын. Не себепті солай боп жатады?
Бәлкім, сіздің ішін жалтыратып ашып, кіндігін көрсетіп,

көрімдік сұрап, етегін ашып жүрген қыздар мен келіншектерді көре-көре көзіңіз талған болар?! Мінекей, бұзық бала қайдан шығады? Кіндікке түрлі адамның көзі түседі, оның ішінде ниеті дұрыс адам да бар, арам пиғылды пенде де бар дегендей...Сол көзқарас арқылы жаман энергия жиналады. Оған қоса, Ислам әлемінде де: « Қуысты ібіліс мекендемес үшін таза ұстау керектігін,» - ескертеді емес пе?! Ал, сіз бен біз бала ана жатырында жатқанда анасымен тікелей кіндік арқылы байланысатынын беске білеміз ғой (Еске түспесе, «Тәнтану» оқулығын бір қарап шыққан жөн). Олай болса, жас күнінде кіндігіне ібілісті ұялатып, бала өсе келе оның теріс қылықтарының қайдан пайда болғанын білмей дал болмай-ақ қойыңыз, болашақ ана! Ал, болашақ әкелер жанұяға адал ас тауып әкелуге ұмтылуы керек, себебі ұрлық-қарлық, біреуді алдап-арбаумен, қорқытып-үркітумен, яки арам жолмен келген ас ана сүті арқылы балаға барады. Осыдан-ақ баланың қандай болып өсері айқындалады ғой. Жарларың ибалы, астарың адал болсын, достар!

«Сайлау» спектакліне дайындық аяқталды!

Сайлаудың өткен жылдардағы сайқымазақ кейпі кішкене болса да жөнделгендей. Бұрын-соңды оппозициялық партиялардың сайлау алды жарнамалары бүкіл телеарналардан сан мәрте қайталанбақ түгілі, партия және оның мүшелері туралы жан-жағыңызға жақсылап қарап алып барып сөз бастайтын едіңіз. Бүгінде әлдеқайда ашық науқан жүріп жатыр. Спектакльге дайындық кеше түнгі 12-де біткен болатын. Бұл аралықта «Нұр-Отан» ел аралап, аты шулы әншілермен ел-жұртты, ауыл-аймақты тербелтіп қайтты. Сайлау келе қалса, ауыл концертке қарық болып қалады емес пе?! Дәл сол сәтте ауылда болмағаным өкінішті-ақ. Ал, «Ақ жолға» келер болсам, бұл партияның бір-екі концертін көрген болатынмын. Меніңше, жаһандану үрдісіндегі концерт болды, бірақ соңына қарай 70-80 жылдардағы әндермен апа-аталарды баурап алды. Елдің сағынып қалғаны айдан анық екен. ЖСДП-ға келер болсақ, бұл партияның қолдаушылары үгіт қағаздарын өте белсенді таратты, яғни пикет жұмыстары жақсы жүрді. Басқа партиялардың іс-әрекетін тек теледидар, жаңалықтар арқылы ғана біліп отырдым десем де болады. Тағы бір ескере кететін жағдай, егер оқу кезеңі болса, бүкіл студент аты алашқа әйгілі «Нұр-Отан» партиясының күлімен шығып, отымен кіріп жүрер еді-ау… Бірақ, сол кезеңнің сұрқия саясаттың әсерімен студенттер қауымына қайғы сыйламағанына өзгені қайдам, өзім қатты қуандым.
P.S. Көптеген адамдардың пікірлері: « «Нұр-Отан» қалайда жеңеді ғой, мен басқаға беремін,»- дегеннің аясына тоғысады. Осындай ойдағы адамдар көбейіп, ертең «көке-партиядан» басқасы алға шығып кетсе қызық болар еді?!

Бақыт қайда барады?

Жақында бір қызық түс көрдім. Әрине, түс – ғайып. Десек те, Ислам әлемінде: « Көрген түсіңнің жақсылығын Алладан тілеу керек,» - деп жатады.
…Түсімде аппақ әдемі құс иығыма келіп қонып жатыр екен. Мен оның «Бақыт құсы» екенін тани кеттім. Ертегіден естіген киелі құспен тілдесіп қалғым келді. Бірақ, бар-жоғы екі-ақ сұрақ қойып үлгердім:
- Бақыт, қайдан келесіз?
- Ынтымағы жоқ,
Зомбылығы көп,
Ұлы ұлықсыз,
Қызы қылықсыз,
Қарттары сыйсыз,
Жастары үйсіз,
Балалары сатулы,
Қабақтары қатулы,
Анасы - араққор,
Әкесі – нашақор,
Өз тілі шықпаған,
Өзге дін қаптаған,
Көршісі арам,
Астары харам,
Әлдісі жекірген,
Әлсізі секірген,
Бауыры тас,
Туысы қас,
Шендісі ойсыз,
Халқы тойсыз елден келемін.
- Сонда қайда барасыз, бақыт?
- Бірлігі баянды,
Ата-анасы аяулы,
Ұлы ұлағатты,
Қызы инабатты,
Жастары жалынды,
Қарттары бағулы,
Шағымы аз,
Көңілі жаз,
Көршісі қадірлі,
Елі сабырлы,
Игілігі көп,
Сөздері дөп,
Ұстазы асыл,
Жақсылығы басым,
Білімді бағалайтын,
Өнерді жағалайтын,
Көңілдері күйлі,
Оралманы үйлі,
Шенеунігі саналы,
Салт-дәстүрі бағалы елге барамын, - дей бергенде ұйқымнан оянып кеттім. Ояндым да сан алуан ойға баттым. «Бақыт құсы», яки киелі құс біздің елден келеді ме екен, әлде біздің елге келе жатыр ма екен?

Блогыма қош келдіңіз!

Бүгін Алла өз блогымды ашудың сәтін салыпты. Akboken блогы қазақ блогтарының арасында өзіндік орнын табады деген сенімдемін.
Блогта рухани, әдеби, мәдени һәм құқықтық дүниелерге назар аударатын боламын.
Блогта жиі жолығысайық!!!